Touristerezh
Ober anaoudegezh gant Plougastell
Plougastell-Daoulaz zo ur gêr eus an arvor ma’z eo kreñv al labour-douar hag an hengounioù relijiel. Gant kement-se ez eo bet merket ar c’horn-bro dre ma’z eus bet savet war ar maez e-leizh a savadurioù foran (lennoù, fornioù bara, skolioù ar c’hêriadennoù) pe sakr (kalvarioù, chapelioù…).
Gant an traoù pouezus-se eus an endro buhez pemdez e vez roet muioc’h c’hoazh a bouez hag a ster da vuhez sevenadurel ar gumun, d’ar gouelioù pobl, ha d’ar pezh a reomp asambles gant ar braz eus an dud.
Intret eo Plougastell-Daoulaz a hengoun, en tu-hont da Virdi ar Sivi a gont penaos ez eo deuet ar sivi en he istor hag al lañs o doa bet war douar ar gumun, hag en tu-hont d’he C’halvar meur. Digor eo war dachennoù all, ar sevenadur hag ar sport, en ur lakaat war-sav tamm-ha-tamm ur politikerezh kehentiñ hag a ziazez he zalvoudoù : Festival ar fent, ar renk Kêr Sportel hag Oberiant abaoe 2017…
Ar ger-stur war ardamez kêr « War zouar ha war vor » a zegas da soñj e oa Plougastelliz martoloded ha labourerien-douar war un dro.
Glad Plougastell
Ur gêr ha maezioù eo gourenez Plougastell war un dro, ha dibar eo gant liesseurted he glad : istor, arkitektouriezh, mor pe natur… Plougastell he deus gouezet mirout he identelezh, kreñv, hep he far, engravet en he reier, he hentoù-don hag he aodoù…
Kalvar Meur Plougastell
En un dibunadeg greunit kreñv, 181 a dudennoù a gont deomp istor ar C’hrist, renket e daou heuliad bern-ouzh-bern en-dro d’ar sichenn. Bep hañv, e miz Gouere hag e miz Eost, e vez un heñcher hag a zispleg doareoù ar Monumant rummet-se savet etre 1602 ha 1604.
Ar chapelioù
Strewet ez eus 8 chapel war douar ar gumun. Digor e vezont da-geñver ar Pardonioù, Devezhioù europat ar glad, pe pa vez aozet gweladennoù gant Mirdi ar Sivi hag ar Glad : Itron Varia ar Feunteun Wenn – Sant Drenan – Sant C’hlaoda – Sant Langiz – Sant Treveur – Langristin – Sant Wennole ha Sant Yann (enskrivet e renabl ouzhpenn ar Monumantoù Istorel).
Ar glad an natur hag an douarouriezh
Etre an douar hag ar mor emañ Plougastell, hag eno ez eo puilh ar pinvidigezhioù naturel a stumm he adremez ken liesdoare. Liesseurt eo ar meteier naturel, ha liesseurt-kaer ar spesadoù loened ha plant.
Seurtoù meteier naturel zo, pe annezioù, o deus ur statud gwarez hag a warant gwarez ar spesadoù a gav bod eno (Sturiad europat « Annez Loened Plant » – « lec’hiennoù Natura 2000 ») :
- Lanneier sec’h an aod
- Al lec’hidegoù hag ar paludoù
- An takadoù koadek gleb
- Ar pradoù gleb e goueled an traoñiennoù
- An aod-vev roc’hellek
- Ar bankoù maerl
- Ar glazidegoù
E-touez ar spesadoù loened pe plant heverk e kaver :
- Brizhiged-ar-geunioù – Euphydryas aurinia (balafenned)
- Maligorned Kemper – Elona quimperiana
- Ar skraviged boutin
- An heskenneged-kuch
- Ar serapiaz-bihan – Serapias parviflora (Orchidaceae)
- Ar bokedoù-dimezell-ar-gwenan – Ophrys apifera (Orkideennoù)
- Al lavand-arvor – Limonium humile
- Raden-ar-greier – Hymenophyllum tunbridgense
- Ar raden-goañv – Dryopteris aemula
A-fet an douarouriezh ez eus e Plougastell teñzorioù ha n’o deus ket o far en Europa, dedennus-kaer evit a sell ouzh ar bedagogiezh :
- tolzad koural beg an Arvor
- erv an Oberlac’h
- ar c’hersantit
- Lec’hienn arkeologel Roc’h an Impalaerez
Setu perak ez eo kevelet kêr gant Park natur rannvroel Arvorig evit tapout al label Geopark Armorique.
Glad ar mor
Plougastell a ro bod d’an dolpadeg bigi glad brasañ e morlenn Brest. Bodet eo ar bigi a ziskouez obererezh ar vro war vor e porzh Tindu dreist-holl.
Ar Marie-Claudine
(Bag dibar a-fet ar glad)
Ar Saint-Guénolé
(Perc’hennet gant kêr Blougastell)
